Монголын Бэлчээр Судлалын Ногоон Алт Төв болон Хөдөө аж ахуйн их сургуулийн Мал Аж Ахуй, Биотехнологийн Сургууль хамтран ажиллах гэрээний хүрээнд дундын лаборатори байгуулж, бэлчээрийн мал аж ахуйн чиглэлээр эрдэм шинжилгээ, судалгаа, сургалтын хамтын ажиллагаагаа өргөжүүлэхээр боллоо.

Уур амьсгалын өөрчлөлтийн нөхцөлд бэлчээрийн мал аж ахуйн тогтвортой хөгжлийг дэмжих, малын метан (CH₄) ялгаруулалтыг хэмжих, багасгах боломжийг системтэй тодорхойлох, бэлчээрийн экосистемийн нүүрстөрөгчийн шингээлтийн нөөцийг үнэлэх, “Бэлчээр-Мал аж ахуй” уялдааны туршилт, судалгааны ажлыг хамтран хэрэгжүүлэх зорилготой юм.

Хамтын ажиллагааны үндсэн чиглэлүүд:

• Бэлчээрийн экологи, мал аж ахуйн тогтвортой менежментийн чиглэлээр хамтарсан судалгаа хийх.
• Бэлчээрийн малын хүлэмжийн хийн ялгаруулалт, нүүрстөрөгчийн шингээлтийг хэмжих, тооцоолох арга зүйг хөгжүүлэх.
• Мэргэжилтэн, судлаач солилцох, хамтарсан сургалт зохион байгуулах.
• Судалгааны үр дүн, шинжлэх ухааны мэдлэг, туршлагаа харилцан солилцох.